सुर्खेत । कर्णालीका मुख्यमन्त्री महेन्द्रबहादुर शाहीले दिएको राजिनामा स्वीकृत भएको छ । काँग्रेससँगको सहमतिअनुसार नयाँ आलोपलो सरकार सञ्चालन गर्नका लागि मुख्यमन्त्री शाहीले सोमबार राजिनामा दिनु भएको हो । शाहीको राजिनामा प्रदेश प्रमुख गोविन्द्रप्रसाद कलौनीले स्वीकृत गर्नुभएको छ ।
संविधानको धारा १६९ को उपधारा (१) को खण्ड (क) बमोजिम सोमबार शाहीले राजिनामा प्रदेश प्रमुख कलौनी समक्ष लिखित राजिनामा दिनुभएको थियो । राजीनामा प्रदेश प्रमुख कलौनीले सोमबारदेखि नै लागू हुने गरी स्वीकृत गर्नुभएको प्रदेश प्रमुख कार्यालयका सचिव ठाकुरप्रसाद सिग्देलले जानकारी दिनुभयो ।
उहाकाअनुसार संविधानको धारा १६८ को उपधारा (२) बमोजिम प्रदेश सभामा कुनै पनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुई भन्दा बढी दलहरुको समर्थनमा बहुमत प्राप्त गर्न सक्ने प्रदेश सभाको सदस्यलाई आज मंगलबार रातको ७ः३० बजेभित्र मुख्यमन्त्री पदमा नियुक्ती गर्ने प्रयोजनका लागि दाबी पेश गर्न आह्वान गरिएको छ ।
