- काठमाण्डौ । पछिल्लो २ हप्तादेखि राहदानी विभागमा राहदानी लिनेको सङ्ख्या एक्कासी बढेको छ । सामान्य अवस्थामा भन्दा अहिले दैनिक दोब्बरको सङ्ख्यामा सेवाग्राही बढ्दा राहदानी बनाउन विभाग आइपुगेकाहरूले समयमा काम सम्पन्न नभएको गुनासो गरेका छन् ।
राहदानी बनाउने सङ्ख्या बढेपछी २ हप्ता देखि विभागले टोकन प्रणाली लागु गरेको छ । जस अनुसार कात्तिक २६ गते सम्मका लागि विभागले टोकन वितरण गरिसकेको छ । बैदेशिक रोजगारिका लागि तिहार अगाडी नै राहदानी बनाउनुपर्ने भए पनि विभागले टोकन वितरण गरिसकेकोले काम नबनेको इलामका उज्ज्वल चापागाईले बताउनुभयो ।
विभागले सामान्य अवस्थामा दैनिक ७ देखि ८ सयलाई राहदानी दिने गरेको थियो । सेवाग्राहीको चाप बढेपछि १ हजार ४ सयलाई एकैदिन राहदानी वितरण गरेको राहदानी विभागले जनाएको छ ।
भीड बढे पनि सकेसम्म सहज हुने गरी काम गरेको विभागका निर्देशक सागर फुयाँलले बताउनुभयो । डिभी भर्ने, रोजगारीका लागि इजराइल जाने र ब्रिटिस आर्मिमा जाने लगायतको प्रयोजनका लागि अहिले राहदानी बनाउनेहरु बढेका छन् ।
