मुगु । जिल्लास्थित सोरु गाउँपालिकाका नेर र ताँजा गाउँका स्थानीयबासी अझै सञ्चारविहीनताको अवस्थामा छन् । सञ्चार सेवा नहुँदा स्थानीयलाई सास्ती भएको छ ।
करिब ३ सय ६० घरधुरी रहेको नेर र ताँजा गाउँमा अहिलेसम्म मोबाइल नेटवर्कदेखि अन्य सञ्चार सुविधा नहुँदा स्थानीयलाई जिल्ला बाहिर र जिल्लाभित्रै पनि सम्पर्कमा जोडिन सास्ती हुने गरेको हो ।
नेर गाउँका कृतिसिंह बुढाले भने‚ ‘अरु गाउँमा मोबाइल, इन्टरनेट, कम्प्युटर चलाउने भइसके; हामी अझै सञ्चारविहीन छौं ।’ जिल्ला बाहिर रहेका आफन्तलाई सम्पर्क गर्न र गाउँमा कुनै मानवीय घटना भए प्रहरी प्रशासनलाई खबर गर्नसमेत सास्ती हुने गरेको उनको गुनासो छ ।
सञ्चार सेवाको अभावमा गाउँमा कोही बिरामी हुँदा अथवा तत्काल सुत्केरीलाई उद्धार गर्नुपर्दा निकै गाह्रो अवस्था भोग्नुपरेको बुढाको भनाइ छ ।
मुगुका चारवटा स्थानीय तहअन्तर्गत २ सय २३ वटा गाउँमा मोबाइल नेटवर्कले काम गर्ने भए पनि नेर र ताँजा गाउँ भने अहिलेसम्म संचारबाट अछुतो छ ।
जिल्ला सदरमुकाम गमगढीदेखि २४ कोष टाढा रहेको नेर गाउँका स्थानीयले दलका नेतादेखि जनप्रतिनिधिसँग मोबाइल टावर माग गर्दै आए पनि कार्यान्वयन नहुँदा चिन्तित बनेका छन् । #कान्तीपूरबाट