प्यूठान । प्यूठानमा बेहुला बेहुली सहित जन्ती बोकेको जिप दुर्घटना हुँदा ८ जनाको मृत्यु भएको छ । प्युठानका प्रमुख जिल्ला अधिकारी खिमराज भुसालका अनुसार मृत्यु हुनेमा ५ महिला र ३ पुरुष गरि ८ जना छन् । मृतक कसैको पनि पहिचान नखुलेको उहाँले जानकारी दिनुभयो ।
५ जना घाइतेलाई उपचारका लागि अस्पताल ल्याईएको छ । जिल्लाको नौबहिनी गाउँपालिकाको लुङ बाउनेबाट बेहुली लिएर गौमुखी गाउँपालिकाको लिवाङ जाँदै गरेको ग १ ज ५०९२ नम्बरको जिप ओखरपाटामा आज बिहान ३ बजे दुर्घटनामा परेको थियो ।
जिल्ला प्रहरी कार्यालय प्यूठानका प्रमुख सत्यनारायण थापाका अनुसार सडकमा पहिरो गएका कारण जिप दुर्घटनामा परेको हो । जिप सडकदेखि तीन सय मिटर तल खोल्सामा खसेको छ ।
घाइते सबैको प्यूठान जिल्ला अस्पतामा उपचार भइरहेको छ । घटनाको पूर्ण विवरण आईसकेको छैन ।
