काठमाण्डौ – प्रधानमन्त्री शेरबहादुर देउवाले नेपाली कांग्रेसका केन्द्रीय सदस्य नारायण खड्कालाई परराष्ट्र मन्त्रीमा नियुक्त गरेका छन । खड्काले बुधबार नै सपथग्रहण गर्ने तयारी भइरहेको छ ।
दिउँसो २ बजे भित्र उनलाई शपथ ग्रहण गराउने तयारी भइरहेको बालुवाटार स्रोतले जनाएको छ । खड्काले कांग्रेसमा परराष्ट्र विभाग हेर्दै आएका थिए ।
खड्काले अर्थशास्त्रमा पीएचडी गरेका छन । उनी सकभर आजै बेलुका संयुक्त राष्ट्रसंघीय महासभामा नेपाली प्रतिनिधित्व मण्डलको नेतृत्व गर्दै अमेरिका जाने तयारी छ । आज नभ्याए भोलि बिहान खड्कासहितको टोली अमेरिका जाने तयारी भएको परराष्ट्र मन्त्रालयले जनाएको छ ।
सत्ता गठबन्धनका नेताहरुको हिजोको बैठकमा खड्कालाई परराष्ट्रमन्त्री नियुक्त गर्ने सहमति भएको थियो । तर, पार्टी भित्र छलफल नगरेको भन्दै कांग्रेसका वरिष्ठ नेता रामचन्द्र पौडेल पक्षले आपत्ति जनाएको छ । यस विषयमा आज कांग्रेसको पदाधिकारी बैठकमा छलफल हुनेछ ।
बैठक बुढानिलकण्ठमा दिउँसो ३ बजे बस्ने छ । बैठकमा पार्टीको १४ औँ महाधिवेशनका विषयमा पनि छलफल हुनेछ । क्रियाशील सदस्यता विवादले १३ जिल्लामा कांग्रेसको वडा तहको अधिवेशन प्रभावित भएको छ ।
