दैलेख । महाबु गाउँपालिकाका अध्यक्ष जंगबहादुर शाहीले विद्यालयको संख्या बढे जति शैक्षिक सिकाई गुणस्तर सुधार हुन नसकेको बताएका छन ।
शिक्षाका लागि राष्ट्रिय अभियान नेपाल दैलेखले आज गैंडाबाजमा आयोजना गरेको अन्तरराष्ट्रिय शिक्षक दिवस कार्यक्रममा उनले यस्तो बिचार राखेका हुन ।
अध्यक्ष शाहीले विद्यालयको भौतिक पूर्वाधार निर्माणमा गाउँपालिकाले प्रयाप्त बजेट परिचालन गरेको र त्यस अनुसार विद्यार्थीहरुको सिकाई स्तर सुधार गर्न सबै शिक्षकहरु इमान्दार भएर लाग्नुपर्ने सुझाव दिएका छन ।
अन्तरराष्ट्रिय शिक्षक दिवस कार्यक्रमको अवसरमा सेवा निबृत शिक्षकहरु सिंहबहादुर बोगटी, अम्मरबहादुर थापा र जयन्ती मावि खरिगैराकी प्रधानाध्यापक सरिता गुरुङ्गलाई खादा र टीका लगाएर गाउँपालिका अध्यक्ष शाहीले सम्मान गरेका छन ।
सम्मान ग्रहण गरेपछि पूर्वशिक्षक सिंहबहादुर बोकटीले शिक्षक समाज परिवर्तनका बाहक भएको तर पछिल्लो समय केही शिक्षकहरु आफैमा व्यवहार सुधार गर्न नसकेको कारण सबै शिक्षकहरुको सम्मान हराएको टिप्पणी गरे ।
जयन्ती मावि खरिगैराकी प्रधानाध्यापक सरिता गुरुङ्गले शिक्षकहरुलाई वर्तमान समय अनुसार सूचना प्रविधिको सीप विकास गर्न तालिमको जरुरी रहेको औल्याईन ।