काठमाण्डौ । शहीद स्मारक ए डिभिजन लिग फुटबलमा दुई चरणका खेल दशरथ रंगशालामा हुने भएका छन् । मंसीर ३ गतेदेखि सुरु हुने प्रतियोगितामा सुरुवाती दुई चरणका सबै खेल दशरथ रंगशालामा हुने भएका हुन् ।
अखिल नेपाल फुटबल संघ एन्फाले यसअघिको तालिकालाई हेरफेर गरी नयाँ खेल तालिका सार्वजनिक गरेको हो । यसअघि एन्फाले दशरथ रंगशाला र एन्फा कम्प्लेक्स सातदोबाटोमा खेल हुने जनाएको थियो । लिगको उद्घाटन खेलमा फ्रेन्ड्स क्लब र सातदोबाटो युथ क्लब खेल्नेछन् ।
दशरथ रंगशालामा हुने उद्घाटन खेल फ्लड लाइटमा खेलाइनेछ । दोस्रो दिनदेखि हरेक दिन दुई वटा खेल हुने छन् । पहिलो खेल १ बजे हुनेछ भने दोस्रो खेल पौने पाँच बजे सुरु हुनेछ । प्रतियोगितामा १४ टोलीले सहभागिता जनाउने भएका छन् ।
