दैलेख : कोरोना भाइरसको महामारीबाट जोगिन दैलेख जिल्ला प्रशासनले आवतजावतमा रोक लगाएको छ । सदरमुकाम समेत रहेको नारायणसहित अन्य पालिकाहरुमा संक्रिय संक्रमितको संख्या बढ्दै गएपछि कोरोना संक्रमण रोक्न जिल्ला प्रशासन कार्यालय दैलेखले थप नयाँ मापदण्ड लागु गरेको हो ।
स्थानीय कोभिड–१९ संकट व्यवस्थापन सञ्चालन केन्द्रको आज बसेको सर्वदलीय र सर्वपक्षीय बैठकले दैलेख बजारमा रहेको अत्यावश्यक बाहेकका पेशा व्यवसायहरु दैनिक विहान ७ बजेदेखि ११ बजेसम्म खुल्न दिने निर्णय गरेको जिल्ला प्रशासन कार्यालय दैलेखका प्रमुख जिल्ला अधिकारी सन्तबहादुर सुनारले जानकारी दिए ।
उनकाअनुसार यो नियम सरस्वती मावि तर्ताङ्गदेखी कलेलचौक, भैसेखोरसम्म लागु हुनेछ । तर इन्धन, औषधी पसल, खाद्यन्न, फलफूल, दुध डेरी र एग्रोभेट सञ्चालनमा भने समय तालिका लागू नहुने प्रजिअ सुनारको भनाई छ ।
कोरोनाको संक्रमण जिल्लास्थित सरकारी, संस्थान, संघसंस्था र बैँक तथा वित्तिय संस्थाका कर्मचारीहरुमा देखिएकाले आवश्यक जोखिमलाई मध्यनजर गर्दै मंगलबारदेखि अत्यावश्यक बाहेक अन्य सबै सेवाहरु असोज १५ गतेसम्मका बन्द गर्ने केन्द्रले निर्णय समेत गरेको छ ।
‘दैलेख सदरमुकामको बजार क्षेत्रबाट जिल्लाका अन्य स्थानीय तह र अन्य स्थानीय तहबाट दैलेख बजारमा अत्यावश्यक काम बाहेक आवागमन राेक गर्ने समेत निर्णय गरेका छौं’ प्रजिअ सुनारले भने, ‘तर सार्वजनिक सवारी आवतजावतमा भने कुनै रोकावाट गरिने छैन् ।’ दैलेखमा हालसम्म कोराेना संक्रमितको कुल संख्या एक हजार दुई सय ५३ छ । योमध्य हालसम्म कोरोना जितेर एक हजार २० जना डिस्चार्ज भएका छन् ।एक सय २९ जना भने जिल्लाका विभिन्न आइसोलेसनमा उपचार भइरहेको छ । जिल्लामा हाल संक्रिय संक्रमितको संख्या ९९ जना रहेका छन् ।
