दैलेख । नेकपा एमाले दैलेखको अध्यक्ष पदका लागि नेता नन्दकिशोर बस्नेतले उम्मेदवारी दिने घोषणा गर्नुभएको छ । बस्नेतले आज पत्रकार संग कुरा गर्दै एमाले दैलेख जिल्लाको अध्यक्षका लागि उम्मेदवारी दिने घोषणा गर्नुभएको हो । पुस २३ गते हुने जिल्ला अधिवेशनबाट दैलेखमा नयाँ नेतृत्व चयन हुँदैछ ।
नेकपा एमालेलाई बलियो र सशक्त बनाउन आफूले उम्मेदवारी घोषणा गरेको बस्नेतले बताउनुभयो । दैलेखका जनताले फरक नेतृत्व चाहेका र त्यो नेतृत्वका लागि आफू सक्षम रहेको, पार्टीको आन्तरिक जीवनलाई मजवुत बनाउँदै दैलेखमा एक नम्बरको पार्टी बनाउनको लागि आफूले अध्यक्षमा उम्मेदवारी दिने बस्नेतले बताउनुभयो ।
औद्योगिक क्षेत्र व्यवस्थापन लिमिटेडका अध्यक्ष समेत रहेका बस्नेतले उद्योगका माध्यमबाट देशलाई समृद्ध बनाउन आफूले काम गरिरहेको बताउनुभयो ।
सो कामलाई अझ तीब्र गतिमा अगाडि बढाउन आफूले उम्मेदवारी घोषणा गरेको उहाको भनाइ छ । एमाले अध्यक्ष केपी ओलीले लिएको समृद्ध नेपाल सुखी नेपालीको आकांक्षालाई पूरा गर्न आफूले नेतृत्वमै बसेर काम गर्न चाहेको समेत बस्नेतले बताउनुभयो ।