मूगू । मुगुका ४ वटै पालिकामा सीमा निर्धारणमा विवाद देखिएको छ । स्थानीय जनप्रतिनिधिको कार्यकाल सकिन थाले पनि उनीहरूले विवाद समाधानमा चासो दिएका छैनन ।
जिल्लाका पालिकाहरूबीच मात्र हैन, छिमेकी जिल्लासँग पनि सीमा विवाद उस्तै छ । छायानाथरारा नगरपालिकासँग सीमा जोडिएको जुम्लाको डाब र घुच्चीलेक क्षेत्रमा विवाद छ ।
२०७५ मा उक्त स्थानमा नगरपालिकाले गेट बनाउन लाग्दा जुम्लाको कनकासुन्दरी गाउँपालिकाका स्थानीयले आफ्नो वन क्षेत्रमा गेट बनाउन पाइँदैन भन्दै विरोध गरेका थिए ।
तर पालिकाले बेवास्ता गरी स्वागतद्वार बनाएपछि कनकासुन्दरीका बासिन्दाले भत्काइदिएका थिए । नगरपालिकास्थित पिना, मुन्दु र कोटिलाका स्थानीयले भने घुच्चीडाबदेखि नेपाली सेनाको ब्यारेकसम्मको क्षेत्र आफ्नो दाबी गर्दै आएका छन ।
कनकासुन्दरीका स्थानीयले सातमोडभन्दा माथिको चौरको छेउबाट आफ्नो सिमाना भनेर दाबी गर्न थालेपछि सीमा विवाद बल्झिँदै गएको छ ।
विवाद समाधानका लागि नगर प्रमुख हरिजंग शाहीसहित पिना गाउँका स्थानीय र कनकासुन्दरीका अध्यक्ष नरवीर रावतसहितको टोलीबीच पटकपटक छलफल भए पनि सहमति हुन सकेको छैन ।
मुगु र जुम्लाको सिमाना विवादका कारण दुवै जिल्लाका स्थानीयलाई पशुचौपाया चराउन पनि समस्या भएको पिनागाउँका टक्कबहादुर मल्लले बताउनुभयो । ‘पाँच वर्षसम्म स्थानीय सरकारले आफ्नो सीमा नै छुट्याउन सकेन,’ उहाले भन्नुभयो, ‘अरू समस्या त कति छन् कति, घाँसदाउरा गर्न र पशु चराउनै समस्या भयो ।’
नगरपालिका र छिमेकी जिल्ला हुम्लाको चंखेली गाउँपालिकाबीच पनि सीमा विवाद कायम छ । मुगुतर्फका बाम, पोइपाटा र थपालचौर गाउँका स्थानीय र हुम्लाको दार्मका बासिन्दाबीच गाईभैंसी र भेडाबाख्रा चराउने बेलासमेत पटकपटक विवाद हुने गरेको छ । Kantipur
