सल्यान । सल्यानमा सडक खन्दै गरेको एक्सकाभेटर दुर्घटना हुँदा दुई जनाको मृत्यु भएको छ । जिल्लाको बाग्चौर नगरपालिका–६ मा सिमखोलीस्थित मनिपोले– जामुनेचौर सडक खन्दै गर्दा रा १ क ७१९ नम्बरको एक्सकाभेटर शनिबार राति दुर्घटना हुँदा चालक र सहचालकको मृत्यु भएको हो ।
मृत्यु हुनेमा दाङको बबई गाउँपालिका–४ हापुरे घर भएका चालक ३३ वर्षीय देवराज खत्री र सहचालक छत्रेस्वरी गाउँपालिका १ दमाचौर घर भएका १८ वर्षीय चित्रबहादुर विक रहेको जिल्ला प्रहरी कार्यालय सल्यानका प्रहरी नायब उपरीक्षक सुमित खड्काले बताउनुभयो ।
उहाँका अनुसार चालक खत्रीको घटनास्थलमै मृत्यु भएको थियो भने सहचालक विकको उपचारका क्रममा जिल्ला अस्पताल सल्यानमा मृत्यु भएको थियो ।
एक्सकाभेटर सडकदेखि अन्दाजी ३० मिटर तल खसेको र कसरी दुर्घटनामा परेको भन्ने खुल्न नसकेको हुन सक्ने उहाँले जानकारी दिनुभयो ।
घटनास्थलको जिल्ला प्रहरी कार्यालय सल्यानबाट प्रहरी निरीक्षक र इलाका प्रहरी कार्यालय थारमारेबाट खटिएको प्रहरी टोलीले अनुसन्धान गरिरहेको उहाँको भनाइ छ ।
