हुम्ला । हुम्ला जिल्लाको दक्षिणी क्षेत्र अन्तर्गत अदानचुली गाउँपालिका–२ स्थित ठुलाखोलामा ढुङ्गा ओसार्दै गरेको ट्याक्टर दुर्घटना हुँदा चालकको घटनास्थलमै मृत्यु भएको छ । भे.२ त २०५५ नम्बरको ट्याक्टर दुर्घटनामा सुम्ला घर भएका ३० वर्षीय नगेस रावलको ज्यान गएको जिल्ला प्रहरी कार्यालय हुम्लाले जनाएको छ । जिल्ला प्रहरी कार्यालय हुम्लाका प्रहरी नायब उपरीक्षक शंकर खड्काका अनुसार गल्फागाड–श्रीनगर सडक खण्डका लागि ढुङ्गा ढुवानी गर्ने क्रममा ट्याक्टर ठुलाखोलामा दुर्घटनामा परेको हो ।
दुर्घटनाका कारण ट्याक्टर सडकबाट करिब एक सय मिटर तल खसेको र पूर्ण रूपमा क्षतिग्रस्त भई टुक्रा–टुक्रा अवस्थामा पुगेको प्रहरीले जनाएको छ । दुर्घटनाको वास्तविक कारण हालसम्म खुल्न नसकेको र थप अनुसन्धानपछि मात्र पुष्टि हुने प्रहरीले जनाएको छ । घटनाको जानकारी प्राप्त भएपछि श्रीनगर प्रहरी चौकीको टोली घटनास्थलमा पुगेर सुरक्षा व्यवस्था मिलाइरहेको छ । उक्त ट्याक्टर विश्व बैंकको आर्थिक सहयोगमा निर्माणाधीन कर्णाली करिडोर अन्तर्गत गल्फागाडदेखि श्रीनगरसम्म करिब नौ किलोमिटर सडक कालोपत्रे कार्यका लागि ढुङ्गा ढुवानी गर्दै गरेको अवस्थामा दुर्घटनामा परेको प्रहरीले जनाएको छ ।