कृष्ण शर्मा । सुर्खेत –जुम्ला सदरमुकाम खलंगामा भालुको आक्रमणमा परेर दैलेखका एक दम्पती घाइते भएका छन् । दैलेख जिल्ला घरभई जुम्ला सदरमुकाम खलंगामा बस्दै आएका हिमराज रोकाया र निर्मला रोकाया घाइते भएका हुन्।
विहिवार विहान साढे ४ बजे पसल खोल्न गएका दम्तीलाई भालुले आक्रमण गरेको हो। उनीहरु सदरमुकाम खलंगाको बालमन्दिर नजिकै मोवाइल पसल गर्दै आएका छन्।
घाइतेको कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा उपचार भइरहेको छ। भालुको आक्रमणबाट घाइते भएका मध्ये निर्मलाको अवस्था गम्भीर भएको छ। हिमराजको अवस्था सामान्य रहेको सहायक प्रमुख जिल्ला अधिकारी नन्दराम चौलागाइले जानकारी दिए।
उनले भने,‘पत्नी निर्मलाको ठूलो घाउ छ। पति हिमराजको धेरै ठाउँ घाउ भएपनि सानो सानो छ। उनीहरुको उपचार भइरहेको छ। ’
भालु राति नै बजार पसेको स्थानीय बताउँछन्। भालु इतिहासमै पहिलो पटक सदरमुकाम खलंगा भित्र पसेर आक्रमण गरेको हो। सहायक प्रमुख जिल्ला अधिकारी चौलागाइले भालु नियन्त्रणमा लिन सुरक्षाकर्मी खटाइएको छ। भालु गएको क्षेत्रमा कडा सुरक्षा कर्मी परिचालन गरिएको बताउँदै उनले घरबाहिर निस्कदा उच्च सावधानी अपनाउनको लागि आग्रह गरे।
