जुम्ला । पछिल्लो समयमा मेसिनले राडिपाखी बुन्न थालेपछि जुम्लाका किसानलाई निकै सहज भएको छ । पहिले एक हप्तामा एउटा राडि या पाखी बुन्दै आएका यहाँका किसानले अहिले मेसिनको प्रयोगले सहजै रुपमा राडिपाखी बुन्न थालेका हुन् ।
हातले राडिपाखी बुन्दै आइराखेका जुम्ला तातोपानी गाउँपालिका ७ सर्मी गाउँका स्थानीय चन्द्रबहादुर कुवर मेसिनले राडिपाखी बुनेर आत्मनिर्भर बन्ने बाटोमा लागेको बताउनुहुन्छ ।
राडिपाखी,लिउ र पाखेकोट बुन्न करिब एक हप्ता लाग्थ्यो तर कर्णाली प्रदेश सरकार उद्योग तथा उपभोक्ता हित संरक्षण कार्यालय जुम्लाले मेसिन उपलब्ध गराएर मेसिनबाट राडिपाखी बुन्ने सीप दिएपछि निकै राहत मिलेको स्थानीयले बताएका छन् ।
मेसिनबाट राडिपाखी बुन्ने सीप २१ जनाले सिकेका छन् । उनीहरूले प्रमाणपत्र समेत पाइसकेका छन् । पहिलो पटक मेसिनबाट राडिपाखी बन्ने सीप पाउँदा निकै खुसी भएको किसानहरू बताउँछन् ।
