दैलेख । दैलेखको महाबु गाउँपालिकामा नेपाली काँग्रेसका लक्षमण गुरुङ विजयी भएका छन । गुरुङले एमालेका तर्फबाट गाउँपालिका अध्यक्षका उम्मेदवार हरिप्रसाद उपाध्यायलाई पराजित गर्दै विजयी भएका हुन ।
अध्यक्षमा निर्वाचित गुरुङले २ हजार ९७९ मत प्राप्त गरेका छन् भने उनका निकटतम प्रतिस्पर्धी नेकपा एमालेका हरिप्रसाद उपाध्यायले २ हजार ५१९ मत ल्याउँदै पराजित भएका महाबुका निर्वाचन अधिकृत वीरेन्द्र केसीले जानकारी दिए ।
अध्यक्षमा गाउँपालिका निवर्तमान अध्यक्ष एकीकृत समाजवादीका उम्मेदवार जङ्गबहादुर शाहीले २ हजार २६८ मत ल्याएको जनाइएको छ । शाही २०७४ मा स्थानीय तहको निर्वाचनमा गाउँपालिका अध्यक्षमा एमालेबाट निर्वाचित भएका थिए ।
यसैबिच गाउँपालिका उपाध्यक्षमा नेपाली काँग्रेसका मञ्जु पाण्डे विजयी भएकी छन । पाण्डेले एमालेका उम्मेदवार दुर्गा सिंहलाई पराजित गर्दै उपाध्यक्षमा विजयी भएकी हुन । विजयी पाण्डेले ३ हजार १५५ मत प्राप्त गरेकी छन् भने पराजित सिंहले २ हजार ३०१, समाजवादीका पुन्यप्रभा दशौदीले २ हजार ११३ मत प्राप्त गरेकी जनाइएको छ ।
