सुर्खेत । कर्णाली प्रदेश राजधानी सुर्खेतको वीरेन्द्रनगरमा छाडा पशुचौपायले सडक दुर्घटनाको जोखिम बढेको छ । वीरेन्द्रनगरको बजार क्षेत्रकै सडकमा छाडा पशुचौपाया आउजाउले सवारी सञ्चालनमा असहज भएको छ ।
मंगलगडी चौकदेखि पश्चिम जुम्लारोड कर्णाली राजमार्ग अन्र्तगत एरिचौक हुदै बांगेसिमलसम्म तथा मंगलगडीदेखि पूर्व रत्न राजमार्ग अन्र्तगत सुब्बाकुनासम्मको एरियामा छाडा पशुचौपायले सवारी सञ्चालनमा सकस भएको पाइन्छ । यी एरियामा अत्यधिक सवारी चाप हुन्छ । तर बिच सडकमै छाडा पशुचौपाया बस्न थालेपछि दुर्घटनाको जोखिम बढेको हो ।
सडकमा बसेका तथा आउजाउ गर्ने छाडा पशुचौपायाका कारण सवारी दुर्घटना भएका धेरै उदाहरण समेत छन् । तर छाडा पशुचौपाय नियन्त्रण तथा व्यवस्थापनमा नगरपालिका तथा सम्बन्धित अन्य निकायहरुको ध्यान गएको छैन ।
छाडा पशुचौपाय गाई, गोरु तथा बाछाबाच्छीले सडकमा हिडने र बस्ने गर्दा यातायातका साधन तथा मानिसलाई समेत ओहोरदोहोर गर्न असजिलो भएको स्थानीयको भनाइ छ । यसबिषयमा सम्बन्धित निकायमा जानकारी गर्दा पनि सुनुवाइ नभएको स्थानीयको गुनासो छ ।
