रुकुम । विद्युत् आयोजना निर्माणका लागि रुकुम पूर्वको सिस्ने गाउँपालिकामा हेलिकप्टरबाट सामान ढुवानी गरिएको छ । सडक सुविधा नभएर पैदल मार्गबाट सामान ढुवानी हुन नसक्दा महँगो हवाई ढुवानी गरेर सामान हेलिकप्टरबाट ओसारिएको हो ।
बिहिवार गाउँपालिका–१ मा निर्माणाधीन अवस्थामा रहेको पाखा ओराली लघु जलविद्युत् आयोजनाको लागि हेलिकप्टरबाट सामान ढुवानी गरिएको छ । सिस्ने गाउँपालिका–१ ओख्रेनामा गाउँपालिकाको पहलमा ४६ किलोवाट क्षमताको जलविद्युत् आयोजना निर्माणाधीन छ ।
आयोजना निर्माणको जिम्मा गोक्यो इन्जिनियरिङ कम्पनी लिमिटेड पाल्पाले लिएको छ । कम्पनीले २०७७ साल फागुनमा सिस्ने–२ का दीपक बीसीलाई आयोजना निर्माणको जिम्मा दिएको थियो । बीसीले अबको डेढ महिनाभित्र विद्युत् आयोजना निर्माण सम्पन्न हुने बताउनुभयो ।