बर्दिया । बर्दियाका बाढी प्रभावित राजापुर र गेरुवा गाउँपालिकामा १८ वर्षमाथिका सबैलाई सोमबारदेखि कोभिडविरुद्धको खोप लगाउन सुरु गरिएको छ।
बाढी प्रभावित दुई पालिकामा १८ वर्षदेखि ४४ वर्ष उमेरसम्मका सबैलाई भेरोसेल खोप लगाउन सुरु गरिएको स्वास्थ्य कार्यालय बर्दियाका प्रमुख गोकर्ण गिरीले जानकारी दिए। सरकारले उपलब्ध गराएको कोभिडविरुद्धको खोप राजापुर नगरपालिका र गेरुवा गाउँपालिकामा लगाउन सुरु गरिएको हो।
स्थानीय बासिन्दाले खोप लगाउन पाउँदा खुसी भएको बताएका छन्। १८ वर्षमाथिका उमेर समूहलाई भेरोसेल खोपको पहिलो मात्रा राजापुर नगरपालिका र गेरुवा गाउँपालिकामा बाढी प्रभावितलाई मद्देनजर गर्दै प्राथमिकता दिएर लगाउन शुरु गरिएको गिरीले बताए।
राजापुर नगरपालिकाका २५ हजार ९ सय ७ जना र गेरुवा गाउँपालिकाका १३ हजार ९ सय ३२ जना गरी ३९ हजार ८ सय ३९ जनालाई लगाइने स्वास्थ्य कार्यालय बर्दियाका प्रमुख गिरीले बताए।
बर्दियामा बाँकी रहेका ठाकुरबाबा नगरपालिका, बाँसगढी नगरपालिका, मधुवन नगरपालिका, गुलरिया नगरपालिका, बारबर्दिया नगरपालिका र बढैयाताल गाउँपालिका गरी ६ वटा पालिकामा मंसिर ६ गतेदेखि १८ वर्षमाथिका सबैलाई खोपको पहिलो मात्रा लगाउने तयारी गरिएको समेत उनले बताए।
बर्दियाका ८ वटै पालिकामा १८ वर्षमाथिका झण्डै १ लाख २० हजारजनालाई १० दिनभित्र खोप लगाइसक्ने स्वास्थ्य कार्यालय बर्दियाका कृष्णगोपाल चौधरीले जानकारी दिए।
