काठमाडौं । शिक्षक सेवा आयोगले प्राथमिक तहका शिक्षक पदपूर्तिका लागि विज्ञापन खुलाएको छ । आयोगले आज प्रावि तहका १३ हजार ९३ पदमा विज्ञापन खुलाएको हो ।
आउँदो माघ १३ गतेसम्म नियमित शुल्क ५ सय रुपैयाँमा दरखास्त बुझाउन सकिने छ । त्यसपछि माघ २० गतेसम्म दोब्बर दस्तुर तिरेर दरखास्त दिन सकिने आयोगले जनाएको छ । दरखास्त अनलाइनमार्फत् बुझाउन सकिने छ ।
कर्णाली प्रदेशको हकमा भने ८ सय ३२ पदका लागि विज्ञापन माग गरिएको छ । जस अन्र्तरगत सबैभन्दा कम रुकुम पश्चिममा १५ र सबैभन्दा बढी सुर्खेतमा १६९ पदमा विज्ञापन खुलाईएको छ भने दैलेखमा १३८ पदमा विज्ञापन खुलाईएको छ ।
यस्तै प्रदेश एकमा ३ हजार ३ सय ३२, प्रदेश दुईमा १ हजार ३ सय २५, वाग्मतीमा २ हजार ५ सय २३, गण्डकीमा २ हजार २ जनाका लागि विज्ञापन गरिएको छ । त्यस्तै लुम्बिनीमा २ हजार ६० र सुदूरपश्चिम प्रदेशमा १ हजार १९ पदमा विज्ञापन माग गरिएको छ ।
आयोगले मावि र निमावि तहमा पनि यसअघि नै विज्ञापन खुलाइसकेको छ । खुला तथा समावेशी पदमा प्रतियोगितात्मक परीक्षामाफर्त स्थायी पदपूर्ति गर्न विज्ञापन माग गरिएको आयोगले जनाएको छ ।
योग्यता पुगेका उम्मेदवारले अनलाइन दरखास्त दिन सक्नेछन् । उम्मेदवारले online.tsc.gov.np/ मा आवेदन दिन सक्नेछन् ।
Pra Bi Bigyapan
