काठमाडौं । आगामी आर्थिक वर्षमा सम्पन्न हुनुपर्नेमा हालसम्म ६० प्रतिशत मात्र भौतिक प्रगति रहेको राष्ट्रिय गौरवको आयोजना पुष्पलाल (मध्य–पहाडी) लोकमार्गको दोस्रो त्रैमासिक अवधिको प्रगति विवरण झनै निराशाजनक देखिएको छ ।
सरकारको दोस्रो त्रैमासिक लक्ष्यअनुसार चालू यस अवधिमा भौतिक प्रगति ४० प्रतिशत मात्र देखिएको छ । वार्षिक तुलनामा यो प्रगति घटेर झन् १९ दशमलव ३६ प्रतिशत मात्र रहेको छ ।
भौतिक पूर्वाधार तथा यातायात मन्त्रालयले चालू दोस्रो त्रैमासिक अवधिमा ६० किलोमिटर सडक कालोपत्रे सम्पन्न गर्ने र ६ वटा पुल निर्माण गर्ने लक्ष्य राखेको थियो । जसमा २० किलोमिटर मात्र कालोपत्रे भएको छ भने एउटा मात्र पुल निर्माण सम्पन्न भएको छ ।
मन्त्रालयका अनुसार सरकारले चालू वर्षमा २४० किमी सडक कालोपत्रे गर्ने लक्ष्य राखेको छ भने २४ वटा पुल निर्माण गर्ने लक्ष्य राखेको छ ।
यता, चालू आर्थिक वर्षको वार्षिक लक्ष्य २४० किमी सडक कालोपत्रे गर्ने रहे पनि हालसम्म ३३ दशमलव ५ किमी मात्र कालोपत्रे भएको छ । २४ वटा पुल निर्माण गर्नुपर्नेमा हालसम्म एउटा मात्र सम्पन्न भएको मन्त्रालयको प्रगति विवरणमा उल्लेख छ ।
भौतिक प्रगति हुन नसक्दा पुँजीगत खर्च समेत बढ्न नसकेको पाइएको छ । दोस्रो त्रैमासिक अवधिका लागि लोकमार्ग निर्माणमा २ अर्ब ७१ करोड ७७ लाख विनियोजन गरिएको थियो । जसमा १ अर्ब ४२ करोड ३२ लाख अर्थात् ५२ प्रतिशत मात्र खर्च भएको छ ।
वार्षिक तुुलनामा ८ अर्ब ३ करोड ४५ लाख विनियोजन गरिएको छ । जसमा हालसम्म १ अर्ब ९२ करोड ८१ लाख मात्र खर्च भएको छ ।
निर्माणमा ढिलाइका कारण आयोजनाको निर्माण सम्पन्न हुने अवधि करिब डेढ वर्ष मात्र बाँकी हुँदा पनि अझै ४० प्रतिशत बढी निर्माण कार्य बाँकी छ । अझै दुई दर्जन पुल तथा करिब साढे दुई सय किमी सडक ठेक्का समेत लाग्न बाँकी रहेकाले अबको डेढ वर्षमा निर्माण कार्य सम्पन्न हुन कठिन देखिएको छ ।
मन्त्रालयले २५ वटा पुल र २३६ किमी सडकको ठेक्का लाग्नै बाँकी रहेको जनाएको छ । कतिपयमा ठेक्का लागेर निर्माण नै नभएको अवस्था भए पनि त्यसको अनुगमन गर्ने र दोषीउपर कारबाही भएको पाइएको छैन ।
मन्त्रालयले कुल १८ सय ७९ मध्ये ६ सय ८५ किलोमिटर आयोजनाबाट र ४६२ किलोमिटर अन्य निकायबाट गरेर ११ सय ४७ किमी कालोपत्रे सम्पन्न भएको जनाएको छ । मन्त्रालयका अनुसार १३७ पुलमध्ये ९१ वटा पुल सम्पन्न भएका छन् । राजधानी दैनीकमा खबर छ
