दाङ । प्रहरीले १ ग्राम ५१० मिलिग्राम लागूऔषध खैरो हिरोइनसहित घोराहीमा तीन जनालाई पक्राउ गरेको छ । मंगलबार बेलुका घोराही उपमहानगरपालिका १५ जिल्ला अदालत नजिक रहेको पार्वती नास्ता पसलमा बसिरहेका तीन जनालाई शंकाको आधारमा जाँच गर्ने क्रममा उनीहरूको साथबाट लागूऔषध फेला परेपछि प्रहरीले पक्राउ गरेको हो ।
घोराही उपमहानगरपालिका १५ काठेकोल निवासी २८ वर्षीय विक्रम चौधरी, वडा नं. १७ निवासी २५ वर्षीय सुनिल विक र वडा नं. १४ निवासी २१ वर्षीय सुशील ऐरी पक्राउ परेका हुन् ।
लागूऔषध कारोबार भइरहेको छ भन्ने गोप्य सूचनाको आधारमा जिल्ला प्रहरी कार्यालयबाट खटिएको प्रहरी टोलीले तीनै जनालाई शंकाको आधारमा जाँच गर्ने क्रममा उनीहरूको साथबाट लागूऔषध फेला परेको जिल्ला प्रहरी प्रवक्ता प्रहरी नायव उपरीक्षक मुकुन्दप्रसाद रिजालले बताउनुभयो । उनीहरूविरुद्ध लागूऔषध कारोबार कसुरमा अनुसन्धान भइरहेको उहाले बताउनुभयो ।
