प्रदेश अस्पताल सुर्खेतमा डाक्टरदेखि कर्मचारीसम्मको अभाव कायमै

व्यवस्थापकको पदपूर्ति नहुँदा व्यवस्थापनमा समस्या

कर्णालीदृष्टी संवाददाता ८ आश्विन २०७८, शुक्रबार ०८:१०

सुर्खेत ।  प्रदेश अस्पताल सुर्खेतमा डाक्टरदेखि कर्मचारीसम्मको अभाव कायमै रहेको छ । वर्षेनी नयाँ विशेषज्ञ सेवा थप गर्दै आएको प्रदेश अस्पतालले मागबमोजिम डाक्टर र कर्मचारी अझै पाउन नसकेको हो  ।

३ सय २५ जनाको दरबन्दी रहेको अस्पतालमा करारका समेत गरी अहिले १ सय ८८ जना मात्रै कार्यरत छन् । ‘डाक्टरको संख्या त अहिले थप भएकै छ,’ अस्पतालका प्रमुख मेडिकल सुपरिन्टेन्डेन्ट डा. डम्बर खड्काले भने, ‘तर अन्य कर्मचारीको अभावले गर्दा सेवा चुस्त बनाउन समस्या भइरहेको छ ।’

डा. खड्काअनुसार अस्पतालमा डाक्टरको संख्या पुग्दो भए पनि नर्स, प्यारामेडिक्स, ल्याब, क्लिनिङ, सवारी चालकलगायतको अभाव हुँदा बिरामीको उपचारमा समस्या भएको हो । उनले अहिले अस्पतालमा स्थायीतर्फ ७२, काजमा २ र करारमा १ सय १४ जनाको कार्यरत रहेको जानकारी दिए ।

अस्पतालमा अहिले ६५ डाक्टर कार्यरत छन् । तर उपसचिव र अधिकृत तहका दुई अस्पताल व्यवस्थापकको पदपूर्ति नहुँदा व्यवस्थापनमा समस्या भइरहेको छ । ३१ स्टाफ नर्सको पदपूर्ति हुन नसकेको अस्पतालले जनाएको छ । अहिले अस्पतालमा कार्यरत ८१ मध्ये ५५ नर्स करारमा छन् । डा। खड्काका अनुसार ११ मेडिकल अधिकृत, ३ जना डेन्टल हाइजिनिस्ट, ३ जना एन्थेसियोलोजिस्ट, २ जना कन्सल्टेन्ट अब्सट्रेसियन एन्ड गाइनोकोलोजिस्ट, २ जना कन्सल्टेन्ट जनरल सर्जन, २० जना कार्यालय सहयोगीलगायत १ सय ३७ जनाको पद अझै रिक्त छ ।

अस्पतालले हिस्टो प्याथोलोजी ९बिरामीको शरीरको अंग जाँच गरी रोग पहिचान, डर्मेटोलोजी (छालासम्बन्धी उपचार), स्पाइन सर्जरी (मेरुदण्ड भाँचिएको उपचार), न्युरो सर्जरी (टाउकोको अप्रेसन), डायलसिस सेवालगायत जटिल प्रकारका उपचार प्रवाह गरिरहेको छ । माग गरेअनुसारको बजेट समयमै नपाउँदा पनि धेरै सेवा तत्काल सुरु गर्न नसकिएको खड्काले बताए । उनका अनुसार अस्पतालले विभिन्न विशेषज्ञ सेवा सुरु गर्न करिब ६६ करोड रुपैयाँ बजेट माग गरेको छ । एमआरआई मेसिन खरिद गर्न १८ करोड, मुटु रोगीको शल्यक्रियाका लागि क्याथ ल्याब निर्माण गर्न ८ करोड र क्यान्सरका बिरामीको उपचारका लागि सेटअप बनाउन ४० करोड रुपैयाँ बजेट लाग्ने उनले जानकारी दिए ।

अस्पतालमा अहिले क्यान्सर रोगीको उपचारका लागि आवश्यक पर्ने ४ वटा थिएटर तयार गरिसकेको छ । हाल ३ सय शय्यामा सञ्चालन भइरहेको प्रदेश अस्पताललाई ५ सय बेडमा विस्तार गर्ने अस्पतालको योजना छ । जसको काम सुरु गर्न प्रदेश सरकारले ३ करोड रुपैयाँ बजेट पठाइसकेको छ । अस्पतालले तत्काल आँखाको उपचार पनि सुरु गर्ने योजना बनाएको छ । यसका लागि प्रदेश सरकारले पठाएको २० लाख बजेटले सामान खरिद गर्न टेन्डर आह्वान भइसकेको छ । सामान आइपुगेपछि आँखाको उपचार सेवा पनि सुरु गर्ने अस्पतालले जनाएको छ ।

 

Next Post

सुर्खेत ल्याइएको बासमती चामल बिक्रीमा रोक

८ आश्विन २०७८, शुक्रबार ०८:१०
सुर्खेत । खाद्य व्यवस्था तथा व्यापार कम्पनीले काठमाडौँबाट सुर्खेत ल्याइएको बासमती चामल विक्री वितरणमा रोक लगाइएको छ । काठमाडौँको थापाथलीस्थित कम्पनीको गोदाममा रहेको कुहिएको चामललाई ‘रि पोलिसिङ’ गरी सुर्खेत पठाइएको भन्ने समाचार सार्वजनिक भएपछि बुधवार राष्ट्रिय उपभोक्ता मञ्चको पहलमा जिल्ला प्रशासन कार्यालय, खाद्य प्रविधि तथा गुण नियन्त्रण कार्यालय, वीरेन्द्रनगर नगरपालिका, जिल्ला […]

सम्बन्धित समाचार