सुर्खेत । कर्णाली प्रदेश सभाको नवौं अधिवेशनको दशौं बैठक कार्यसूचीमै प्रवेश नगरी आगामी बुधबार सम्मका लागि स्थगित भएको छ ।
प्रमुख प्रतिपक्षी दल नेकपा एमालेको अवरोधका कारण सभाको सोमबारको बैठक कार्यसूचीमै प्रवेश नगरी आगामी बुधबारसम्मका लागि स्थगित भएको हो ।
कर्णाली प्रदेश सरकार र प्रमुख प्रतिपक्षी दल नेकपा एमालेबीच भएको सात बुँदे सहमति हालसम्म पनि कार्यान्वयन हुन नसकेको भन्दै एमालेले सदन अवरुद्ध गरको हो ।
बैठकमा बोल्दै एमालेका नेता यमलाल कँडेलले सरकारसँग गरिएको सातबुँदे सहमति कार्यान्वयन नभएको कारण उठेर बैठकको अवरोध गर्नुपर्ने अवस्था आएको बताउनुभयो ।
आर्थिक वर्ष २०७८÷०७९ को बजेट टुक्रे भएकोले विभिन्न कार्यक्रममा १५ लाखभन्दा कम रकम विनियोजन गरिएका बजेट कार्यान्वयन नगरिने, मुख्यमन्त्री रोजगार कार्यक्रम सञ्चालन सम्बन्धमा कार्यविधिमा रहेको स्थानीय तहको भूमिका र प्रदेश सभाका सदस्यको भूमिकालाई यथावत राखिने लगायतका सातवटा बुँदामा सरकार लगायतका शीर्ष नेताहरूले हस्ताक्षर गरे पनि कार्यान्वयन नगरेका कारण बैठकमा उठेर अवरोध गर्नुपरेको उहाको भनाइ छ ।
सरकारले लिखित सहमति नजनाएसम्म बैठकमा अवरोध जारी राख्ने कँडेलले बताउनुभयो । गत माघ १८ गते कर्णाली प्रदेश सरकार र प्रमुख प्रतिपक्ष दल नेकपा एमालेबीच बजेट कार्यान्वयन लगायतका विषयमा सातबुँदे सहमति भएको थियो । सोही सहमति कार्यान्वयनका लागि लिखित सहमति नभएको कारण एमालेले सदन अवरुद्ध गरेको हो ।
आर्थिक वर्ष २०७८÷०७९ को आर्थिक अध्यादेश र विनियोजन अध्यादेशलाई प्रतिस्थापित गर्ने विधेयकको टेबल गर्ने कार्यसूची भए पनि प्रतिपक्षले अवरोध गरेका कारण कार्यसूचीमा प्रवेश नगरी बैठक स्थगित भएको प्रदेश सभा सचिवालयका सचिव जीवराज बुढाथोकीले जानकारी दिनुभयो ।
